Nakigbahin ang 88 ka human resource management practitioners sa tulo ka adlaw nga seminar sa Rules on Administrative Cases in the Civil Service (RACCS) nga gipasiugda sa Council of Human Resource Management Practitioners (CHRMP)-Davao del Norte gikan Hunyo 9 hangtod 11, 2026 sa Bulwagan ng Karunungan, Government Center, Mankilam, Tagum City.

Sa iyang mensahe, gidasig ni Dr. Michelle B. Claridad, Supervising Administrative Officer sa Provincial Human Resource Management Office (PHRMO), ang mga partisipante nga pahimuslan ang maong seminar aron mapalambo pa ang ilang kahibalo ug kapasidad sa pagdumala sa mga kasong administratibo sa serbisyo publiko.

Sa unang adlaw sa seminar, gipangunahan nila Atty. Mimie C. Enriquez-Mamicpic ug Atty. Cattleya B. Acaylar-Yanson gikan sa Civil Service Commission Regional Office XI ang diskusyon bahin sa mga lagda ug proseso sa pagdumala sa administratibong mga kaso sa serbisyo sibil.

Gisundan kini sa mga learning sessions nila Atty. Therese Anne C. Licayan ug Atty. Suzannes S. Misagal sa ikaduhang adlaw, ug ni Cherrie Amor O. Tag-at sa katapusang adlaw sa seminar.

Atol sa tulo ka adlaw nga seminar, nakabaton ang mga partisipante og mas lawom nga pagsabot sa mga probisyon sa RACCS, lakip na ang mga proseso sa pag-imbestiga, pagdumala sa mga kaso, ug pagsiguro sa due process sulod sa mga ahensya sa gobyerno.

Pinaagi sa maong seminar, gilauman nga mas mapalig-on pa ang kapasidad sa mga human resource practitioners sa pagdumala sa mga administratibong kaso ug sa pagpatuman sa mga polisiya sa Civil Service, nga makatampo sa mas episyente ug patas nga serbisyo publiko alang sa katawhan.