Ang paghatod sa gitapo nga serbisyo sa Provincial Anti-Drug Abuse Council (PADAC) pamatuod lamang nga wala gayod yataki, hinuon gituboy ang tawhanong katungod.
Kini ang gipahayag ni Davao del Norte Provincial Administrator atol sa paghatod ug serbisyo sa PADAC ngadto sa mga Volunteers Submitted for Reformation (VSR) didto sa Maniki Central Elementary School, Kapalong Davao del Norte.
“Kining atong kalihokan nagpamatuod lang nga dire sa Davao del Norte gina-uphold, ginaprotektahan ang human dignity o tawhanong katungod sa atoang mga kaigsoonan ug mga nahisalaag. . . kining atong ginabuhat usa kini ka timailhan aron atong i-erase, atong i-oppose kanang ingon nila nga ang atong presidente pinaagi sa iyang anti-drug abuse campaign nagyatak sa tawhanong katungod. Dili kana tinuod. In fact the president is the number one protector of human rights and upholding human dignity. . Kitang taga Davao del Norte mao ni ang tipik ug kabahin sa atong kawsa sa anti-drug abuse ubos sa pamunoan sa atong halangdong governor,” pamahayag ni PA Sanchez.
Niadtong Nobyembre 14 (Lunes), 317 ka mga “biktima” sa ilegal nga droga ang boluntaryong misurender ug nakapahimulos sa lain-laing serbisyo nga gitanyag sa PADAC sama sa Rehabilitation Services, Spiritual & Moral Recovery Program, Veterinary Assistance, Farm Management Skills Training, Livelihood Training and Scholarship, Basic Education (Alternative Learning System), Social Services, Legal Services, Sports Development Program, PDRRMC Responder Training, apil na ang short term nga Medical and Hygiene Services, Dental ug X-Ray, libreng gupit, half-body massage ug manicure-pedicure.
Pinakadaghan ang mipahimulos sa Skills ug Livelihood Training.
Gidugang ni Administrador Samson Sanchez nga tumong ug katuyoan gayod sa administrasyon ni Gobernador Anthony del Rosario nga ang gihimong Information Management System sa PADAC diin siya usab ang chairman, nga maseguro ug makahimog eksaktong aksyon ingong interbensyon aron mahabalik sa katilingban ang usa ka VSR.
“Dire gyod gi-launch sa Provincial Anti-Drug Abuse Council ubos sa liderato ni Governor Anthony ang PADAC Information Management System. Usa kini ka management tool para maseguro nga klaro ug konkretong aksyon ug governance sa mga VSR ug eventually ang atoang pagpaningkamot nga ma-reintegrate sa katilingban ang mga VSR. Usa ka tool. . . aron maklaro kung unsa gayod ang intervention sa gobyerno para kaninyo ug kamo usab gikan mismo sa inyo kung unsa ang inyohang gusto nga intervention sa panggamhanan. So dili ingon nga tira-pasagad,” dugang pahayag ni Sanchez.
Ang PADAC naglaom gayod nga uban sa pagtuboy sa tawhanong katungod, adunay mga VSR nga mamahimong usa ka lumulupyo nga mapuslanon kaayo sa katilingban.
“Tungod niini nga pagpaningkamot nato nga maprotektahan ang tawhanong katungod ug ma-uphold ang human dignity sa matag usa, at the end of the whole process niining atong programa nga Aksyon Gabay tungo sa Repormasyon, kamong mga VSR ug kami nga naa sa gobyerno makahatag ug estorya. . . Kamo mismo makapamatuod nga diay . . . wala’y posible nga usa sa inyoha mamahimong world class mason, world class panday, world class electrician o usa ka estorya nga usa ka tawo sa DavNor. . . kanhiay usa ka user, usa ka pusher pero nahimong food producer. . .Kani ang atoang damgo nga unta mapahitabo pinaagi kaninyo, pinaagi kanamo,” paniklop sa probinsyal administrador.
Ang serbisyo didto sa Kapalong sinugdanan lamang sa paghatod ug interbensyon sa sobra 15,000 ka mga drug surrenderees sa tibuok Davao del Norte.
