Mipailawon ang mga personahe sa DepEd, Information Technology (IT) empleyado sa DavNor Capitol ug mga personahe sa Provincial Health Office alang sa pagbansay labot sa Provincial Drug Abuse Council Information Management System niadtong Byernes, Nobyembre 11.   

Kini aron mahanas pa sa himoon nga panagtapok sa serbisyo alang sa mga Volunteers Submitted for Reformation kun VSR (mga voluntary drug surrenderees) nga ipahinabo karong adlawa, Lunes, Nobyembre 11 sa Maniki Central Elementary School, Kapalong, Davao del Norte.

Pagkahuman sa Program Orientation uban sa paghatag ug priority numbers, ang mga VSR moadto na sa PADAC System Documentation (Encoding Areas) aron sa paghatag sa pipila ka kinahanglanong impormasyon nga makatabang sa mga personahe medikal sa pagtino sa hustong aksyon nga himoon. Niini masayran usab ang tinuoray nga kahimtang sa gidugayon ug ang pagkalambigit sa gidili nga droga sa usa ka VSR ug kung unsa nga mga interbensyon ang angay’ng ihatag kaniya. 

Himoon gayod nga sekreto o kompidensyal ang mga impormasyon nga ihatag sa usa ka VSR.

Ang mga interbensyon naglakip sa Rehabilitation Services, Spiritual & Moral Recovery Program, Veterinary Assistance, Farm Management Skills Training, Livelihood Training and Scholarship, Basic Education (Alternative Learning System), Social Services, Legal Services, Sports Development Program, PDRRMC Responder Training, Medical and Hygiene Services, lakip na ang Dental ug X-Ray nga mga serbisyo.

Aduna sab libreng gupit, half-body massage ug manicure-pedicure nga serbisyo aron sa pagpaluag sa dughan sa mga VSR.

Tungod sa gidaghanon nga sobra 15,000 boluntaryong misurender sa tibuok lalawigan, gimugna ang Provincial Drug Abuse Council aron matabangan ang mga nahimong biktima sa ilegal nga droga.     

Ang serye sa mga miting gihimo tali sa kapolisan, probinsyal nga kagamhanan ug sa nalangkit nga mga ahensya sa tuyo nga mapangandaman pag-ayo ang unang komprehensibo nga mga serbisyo alang sa 400 ka mga VSR pinaagi sa Aksyon at Gabay tungo sa Repormasyon (Action and Guidance to Reformation) nga programa sa PADAC.