Gipalig-on ang sektor sa agrikultura sa probinsya pinaagi sa katumanan sa modernong pasilidad nga mao ang Rice Processing System (RPS) II nga nagkantidad og P54.7 milyones ug sa pagtukod sa Drying System Sheds nga nagkantidad og P22.7 milyones. Ang maong mga proyekto opisyal nga gi-inagurahan sa Barangay Capungagan, Kapalong niadtong Disyembre 17.
Gipangunahan ni Gobernador Edwin “Kuya Gob” Jubahib ang seremonyas sa inagurasyon, uban nila Department of Agriculture (DA) Regional Field Office XI Director Macario Gonzaga, representante ni Philippine Center for Postharvest Development and Mechanization (PhilMech) Director Dionisio Alvinia nga si Director Joel Dator, representante ni District II Representative Jose Manuel “JM” Floirendo Lagdameo, Kapalong Mayor Edgardo Timbol, ug mga opisyal gikan sa nagkadaiyang ahensya sa gobyerno. Gitambongan sab ang kalihukan sa mga representante sa nagkalain-laing asosasyon sa mga mag-uuma sa palay sa probinsya, mga department heads sa kapitolyo ug mga Municipal/City Agriculturist.
Sa iyang mensahe, gipahayag sa gobernador nga ang kalampusan sa proyekto bunga sa hugot nga pagtinabangay tali ehekutibo ug lehistabo sa panguna ni Vice Governor Clarice Jubahib ug mga Sangguniang Panlalawigan members pinaagi sa gipanday niining legislative measures.
Iyang gipasalamatan si Presidente Ferdinand Marcos, Jr. sa pagbubo og mga proyekto sa probinsya, si Mindanao Development Authority Secretary Leo Tereso Magno sa mga maabtikong tabang nga gipaabot niini alang sa padayon nga kalamboan sa Davao del Norte, ug mga lokal nga panggamhanan, DA, ug PhilMech alang sa katumanan sa maong dakong proyekto.
Gibutyag nga ang modernisadong pasilidad makahimo sa pagproseso sa palay og duha hangtod tulo ka tonelada matag oras, o kapin 18 ka tonelada matag adlaw, nga dakong tabang sa episyente ug hapsay nga pagproseso sa ani sa mga mag-uuma.
Ang proyekto makahatag og dakong kaayohan sa mga mag-uuma tungod kay mas moubos ang gasto sa pagproseso ug lakip na niini ang pagpauga sa palay. Tumong sa probinsyal nga panggamhanan nga matabangan ang mga mag-uuma nga makab-ot ang hustong presyo sa ilang ani, nga mosangpot sa pagtaas sa ilang kita ug sa pagpalig-on sa industriya sa humay sa probinsya.
Buot ni Kuya Gob nga manguna ang Kapitolyo sa pagpatuman sa proyekto ubos sa DavNor KAAGAPAY, pinaagi sa pagpalit sa bag-ong aning palay sa presyong P18-25 kada kilo. Kini iproseso dayon sa bag-ong pasilidad, ug unya ibaligya sa katawhan sa ubos nga presyong P30-35 kada kilo.
Ang maong lakang sa pagpa-uswag sa agrikutura subay sa “KUYA GOB NG MASA” Developmental Agenda sa probinsya, nga nagtumong sa inklusibo ug malungtarong kalamboan alang sa katawhan sa Davao del Norte.
Writer: Lorna Tripoli
