Nasuko si Provincial Governor Edwin “Kuya Gov” Jubahib sa pipila ka mga politiko nga nalambigit sa kontrobersiya sa korapsyon sa pondo sa flood control program sa nasudnong panggamhanan. Sa iyang pakigpulong sa katawhan atol sa gipahigayon nga OPLAN Kaagapay, Kalinaw ug Kalamboan (OPLAN KKK) sa Barangay Sawata, San Isidro niadtong Septiyembre 16, klaro niyang gipadayag ang iyang kapungot.

“Kung padayon nga ingon-ani nga kurakoton lang ang budget sa national government ug dili makaabot ang budget gikan sa national government paingon dinhi sa atoang mga barangay, unsaon nato pag-asenso og dali kung ingon-ani pirme ang leadership sa atoang nasod?.. Dapat magpakabana ang tanan... Dapat kitang tanan mopakita sa atoang sariling reaksyon nga wala ta nakauyon sa dakong korapsyon nga nahitabo karon sa atoang nasod,” sulti ni Jubahib.

Mipahayag si Gov. Jubahib nga magtukod siya og usa ka investigating team aron susihon ang tanang national projects nga giimplementar sa probinsya.

“Kita sa Davao del Norte himoon nato karon ang imbestigasyon para sa atoang probinsya nga ang mga national program, national projects atong imbestigahan kung aduna ba kini korapsyon during sa ilang implementation,” dugang sa gobernador.

Iyang gipasabot nga kung wala lang gikurakot ang mga pondo, nahuman unta ang daghang proyekto sa kabarangayan ug natagamtam sa katawhan ang benepisyo niini.

Kauban usab sa gobernador si Vice Gov. Clarice Jubahib, Mayor Silvano Gaje, mga department heads, ug pipila ka representante sa nasudnong ahensya. Gihatagan nila ang mga residente og libreng serbisyong medikal ug uban pang ayuda.

Writer: Lorna Tripoli
Photos: Andrew John Hababag