Gimugna sa Probinsyal nga Panggamhanan sa Davao del Norte ubos sa liderato ni Governor Edwin I. Jubahib ang duha ka adlaw nga Livelihood Training on Food Cart Business alang sa mga empleyado sa kapitolyo. Gipahigayon kini niadtong Septyembre 9-10 sa DavNor Tech-Voc Center, Mankilam, Tagum City.
Ang maong pagbansay sa panginabuhian gidumala sa Provincial Administrator’s Office–Employment and Workforce Development Division (PADO-EWDD), pinangulohan ni Gloria Pamugas uban sa pakigtambayayong sa Department of Trade and Industry (DTI) Negosyo Center.
Si Froilan Tarroza sa DTI Negosyo Center nagbatbat sa kamahinungdanon sa pag-apil sa maong training nga nagtudlo sa maayong pagdumala sa negosyo ug pinansyal nga aspeto.
“I-equip sila with entrepreneurial mindset, skills and even strategies on developing a business... I-grab nila ang opportunities since libre na siya and that is for the development of their business,” sumala ni Tarroza.
Gi-engganyo usab ni Ms. Alona More Morales usa sa mga mamumulong sa training ang paggamit sa mga online flatforms aron mas modako ang income sa mga buot magnegosyo.
“Sa DTI gina-encourage gyud namo ang digitalization para sa business kay karon man gud, ‘pag dili ka mag-engage online, dili ka mag-marketing online mapag-iwanan gyud ka. Ang online man gud mas taas ang reach compare sa traditional nga marketing,” ingon ni Morales.
Apan matud niya mas maayong marehistro sa Bureau of Internal Revenue (BIR) ug DTI ang ilang negosyo ma-traditional marketing man o online flatform aron malikayan ang mga penalty.
“Para matawag ta og legit business owner kailangan jud nato mo-register sa BIR... ‘Pag mag-register mo online pinaka-first thing nga pagabuhaton kay mokuha ta’g DTI certificate,” dugang ni Morales.
Samtang, usa ka empleyado nga si Hazel Granada mapasalamaton sa libreng training sa probinsya nga dako’g tabang labi na nga hapit na usab siya moretiro.
“Dako akong pasalamat especially sa atoang Kuya Gov, Gov. Edwin Jubahib sa kini nga opportunity nga iyang gihatag sa amoa sa mga empleyado para madugangan pud ang amoang kahibalo especially aning livelihood training. Dili lang ni basta-basta nga training, big help gyud siya sa amoa, labi na sa akoa nga about five years na lang mag-retire na,” sulti ni Granada.
Writer: Lorna Tripoli
