Nanawagan si Provincial Governor Edwin I. Jubahib sa mga benepisyaryo sa Kawsa sa Agrikultura ug Panginabuhian sa Barangay (KAAGAPAY) nga lig-onon ang ilang organisasyon ug magtinabangay aron mapalambo ang programa.
Gipadayag ni Gov. Jubahib ang iyang mensahe pinaagi sa KAAGAPAY Lead nga si Arnel Montero atol sa ikatulong hugna sa massive orientation nga gipahigayon sa Brgy. Capungagan Gym, Kapalong, niadtong Septiyembre 12.
Kapin sa 200 ka benepisyaryo gikan sa 35 ka People’s Organizations ang mitambong sa kalihokan. Nakadawat sila’g life insurance card ug mga semilyang pananom sama sa durian. Gipasabot ni Montero nga gipondohan og P23 milyon ang KAAGAPAY karong tuiga ug doblehon kini sa sunod tuig aron masiguro ang malungtarong panginabuhian nga mao’y tumong sa gobernador.
“Hangyo ni Kuya Gov ug Vice Gov lig-onon nato ang asosasyon. Lig-onon nato atong grupo... Gusto ni Kuya Gov tudloan mo manginabuhi, tudloan mo’g panginabuhian. Pwede man ‘ni nato sabuton samtang nagbuhi mo’g mga manok. Hatagan mo namo og mga liso sa gulay. Tagaan mo namo’g fertilizers sa KAAGAPAY,” matud ni Montero.
Dugang pa niya, gipalapdan ni Gov. Jubahib ang programang panginabuhian nga dili lang limitado sa gulay, isda, ug free-range chicken. Pinaagi sa expanded KAAGAPAY, gihatagan og higayon ang mga benepisyaryo nga magbuhi og itik, kanding, ug baka.
Sa pakighinabi sa PTV 48 News Coverage Team, mipadayag si Mrs. Jeraldine Kabibil, usa sa mga benepisyaryo, sa iyang dakong pasalamat. Giila niya ang KAAGAPAY isip dako nga tabang sa ilang pamilya ug gidayeg ang inisyatibo ni Gov. Jubahib.
“Kining programa ni Kuya Gov. dako gyud ‘ni og impact sa amoa kay dako kaayo ni’g tabang sa amoa nga mga katawhan kay nagahatag kini’g livelihood program sa pagbuhi sa mga manok... Naglaum ko nga molambo ang amoang organisasyon para makatabang og dako para sa amoang tagsa-tagsa ka kinabuhi,” sulti ni Kabibil.
Gipangulohan usab ang kalihokan ni PAGRO Assistant PG Head ug KAAGAPAY Technical Working Group Coordinator Alphabet Gulanes, uban sa suporta sa PENRO ug mga opisyal sa barangay.
Writer/Photos: Lorna Tripoli
