Giselebrar sa Bahay Pag-asa ang ika-11 anibersaryo niini pinaagi sa usa ka makalingaw nga Dinagyang Festival diin gipakita sa mga kabataan nga residente ang ilang talento ug abilidad. Ang kalihokan gipahigayon sa Multipurpose Evacuation Building and Covered Court niadtong Septyembre 1.
Sa maong selebrasyon, gipresentar usab sa Technical Education and Skills Development Authority (TESDA) ang 18 ka kabataan nga nakatapos sa National Certificate I (NC-I) alang sa Shielded Metal Arc Welding (SMAW) pinaagi sa Sto. Niño Agriculture and Machinery Technical, Inc. gikan sa Carmen. Gipang-display usab ang ilang mga ginama sama sa bags, paintings, ug uban pang produkto nga nagpakita sa ilang kahanas ug pagkamamugnaon.
Kabahin sa okasyon ang pagtunol ni Governor Edwin I. Jubahib og mga plake ug sertipikasyon ngadto sa partner agencies, donors, ug uban pang nagpakabana sa programa sa rehabilitasyon ug pag-atiman sa mga kabataan nga nalambigit sa lain-laing kaso o Children in Conflict with the law.
Sa kasamtangan, kapin sa 20 ka kabataan ang nagpasilong sa Bahay Pag-asa tungod sa mga kaso sama sa pagpangulata, pagpanglugos, ug uban pang paglapas sa balaod. Matod ni DSWD Regional Director Rhuelo Aradanas, pinaagi sa suporta sa publiko ug pribadong sektor, nahimong posible ang padayong pagbarog sa pasilidad nga nagahatag og ikaduhang higayon alang sa kabataan aron magbag-o ug magpadayon sa husto nga dalan.
“Sa loob ng labing-isang taon hindi mabilang na kabataan ang muling nagbalik-loob, nakapagpatuloy ng pag-aaral, at nakahanap ng bagong layunin sa buhay... Our theme, “Dinagyang: Sadsad sang pagtuo, Paghiusa kag Pagpasalamat”, is a call to remember why we are here. Faith gives us the courage to keep fighting for these young lives. Unity reminds us that no single agency or individual can achieve this mission alone,” ingon ni Aradanas.
Naila usab ang Bahay Pag-asa isip usa sa pinakamaayong rehabilitation center sa nasod human makab-ot ang Level 3 accreditation, nga nagpamatuod sa kalampusan ug kalig-on sa pasilidad.
Writer/Photo: Lorna Tripoli
