Gitunol sa mga benepisyaryo sa KAAGAPAY Program ang libre nga life insurance card ug mga semilya sa tanom sama sa durian atol sa massive orientation para sa mga taga-Tagum City niadtong Septyembre 6 sa DNSTC Training Center, Mankilam, Tagum City.
Si KAAGAPAY Lead ug Executive Assistant to the Governor Arnel Montero maoy nagdumala sa aktibidad uban ni Technical Working Group Coordinator Alphabet Gulanes, representante ni Board Member Prospero "Popo" Estabillo, ug mga sinaligan sa Provincial Veterinary Office ug Provincial Agriculturist Office. Si Montero nipasabot nga ang mga libre nga life insurance card magsilbing tabang ni Gobernador Edwin “Kuya Gob” Jubahib sa mga benepisyaryo panahon sa emerhensiya.
Gipahinumdoman usab niya ang mga benepisyaryo mahitungod sa katuyoan ug kamugnaan sa programang KAAGAPAY, nga gisugdan sa gobernador panahon pa sa pandemya.
“During pandemic, bawal mogawas ang mga tao, walay merkado, walay mall, ug economic activity. Now, si Kuya Gob unsay gihimo niya? Pagtan-aw ni Kuya Gob nga mahurot ang pondo sa probinsya kung sige ra’g hatag noodles, bugas, hatag tinapa. Mahurot ang pondo sa gobyerno. mao tong si Kuya Gob nag-initiate, naghimo og programa nga mahimo nga ang katawhan sa Davao del Norte naay makaon sa ilang kaugalingong panimalay, nga dili na kinahanglan nga mogawas mao nang namugna ang KAAGAPAY Program,” ingon ni Montero.
Dugang niya nga ang katuyoan sa ipatumang Expanded KAAGAPAY karon mao ang malungtarong panginabuhian sa mga katawhan.
“Ang programang KAAGAPAY gihimo ni Kuya Gob karon nga tinuod nga panginabuhian. Panginabuhian nga dili panandalian kundili panginabuhian nga kung matarong sa pag-atiman pati pa ang inyong mga apo makabenepisyo sa programang KAAGAPAY,” sulti niya.
Samtang, tumong usab sa orientation ang pagtudlo sa hustong pag-atiman sa free-range chicken ug ang direktiba ni Gov. Jubahib alang sa tukmang pag-implementar sa Expanded KAAGAPAY. Giawhag usab ni KAAGAPAY Lead Montero ang mga Peoples Organizations (POs) nga sa higayon nga pagadawaton nila ang programa sa KAAGAPAY ila kining hatagan og bili ug palamboon ang ilang organisasyon.
Writer/Photos: Lorna Tripoli
