Gisaulog sa Women Development Center (WDC) ang ika-8 anibersaryo sa pagkatukod niini ubos sa tema nga “The Fire Within: 8 Years of Empowering Broken Souls from Silence to Strength, from Fear to Freedom.”
Gidumala sa Probinsyal nga Panggamhanan sa Davao del Norte pinaagi sa Provincial Social Welfare and Development Office (PSWDO) ang selebrasyon ug kini gipahigayon sa WDC Evacuation Center sa Purok 2, Poblacion, New Corella, niadtong Septyembre 4.
Gihatagan og sertipikasyon ug plaque ni Provincial Governor Edwin "Kuya Gob" I. Jubahib ang mga private partners sama sa Tagum Cooperative, GC Tech, ug uban pa, ingon man ang mga Municipal Social Welfare and Development Offices (MSWDOs). Giila ni Jubahib ang ilang dakong tabang sa pagpadayon sa operasyon ug paglahutay sa WDC.
Mitambong isip keynote speaker si Presiding Judge Jimmy Buco sa Branch 2, Family Court. Iyang gipadayag ang panghinaot nga wala na unta’y mabiktima nga kabataan ug kababaenhan sa mga kaso sa pagpangabuso ug pagpanamastamas. Gisiguro usab niya ang paspas nga paghatag og hustisya alang sa mga biktima.
“Padayon sa inyong pag-eskwela. Do not be disturbed by what has happened to you. As a family court judge under this jurisdiction, my responsibility is not to prolong your cases… What I can assure you is that, in my court, your cases will not last for more than a year. I have been able to dispose of cases within six months in the past, and I will do the same this time,” ingon ni Judge Buco.
Gipamatud-an sab ni PSWDO Head Rosalinda Rapista ang kamandoan ni Gov. Jubahib sa pag-atiman sa mga kabataan nga anaa sa pasilidad. Si Rapista nag-ila sa tabang sa mga volunteers nga misuporta sa WDC.
“Tarungon gyud namo ang mga bata nga niabot dinhi. Mao gyud na ang marching order ni Kuya Gov. So, tanan mi maningkamot gyud nga mahatag namo tanan. Dili namo kaya kung kami lang maong naay mga private sectors and mga volunteers,” matud ni Rapista.
Sa pagkakaron, adunay walo ka minor de edad nga nagapadayon sa pagbangon ug nagdawat og tabang gikan sa center aron makapadayon sa ilang kinabuhi, samtang ang ilang mga kaso batok sa mga suspek anaa pa karon gisang-at sa korte.
Writer/Photo: Lorna Tripoli
