Gipundok ang mga kababayen-an gikan sa 11 ka lokalidad sa Davao del Norte atol sa Provincial Rural Improvement Club (RIC) Achievement Day 2025 niadtong Septyembre 2, nga nagdala sa tema “Matatag na kababaihan, Kaagapay sa Maunlad na Kabuhayan sa Kanayunan.”
Gipasiugdahan sa Provincial Agriculturist Office ang kalihokan nga naglantaw sa kababayen-an dili lang isip “ilaw ng tahanan” apan aktibong pwersa sa agrikultura, panginabuhi, ug komunidad.
Sa mensahe ni Governor Edwin Jubahib pinaagi sa iyang Private Secretary Genaro Tado Jr., iyang giila nga ang kababayen-an mao ang “catalysts of transformation” sa komunidad.
“Kung lig-on ang kababayen-an, lig-on usab ang kanayunan, ug lig-on ang probinsya… Ang inyong paningkamot mao ang tinubdan sa kalampusan ug kabag-ohan nga atong ginasaksihan karon,” matod ni Tado.
Samtang si Executive Assistant Dandy Cabonita, nga misulti alang ni Vice Governor Clarice Jubahib, mipasabot nga ang RIC naghatag dili lang og tabang apan tinuod nga kausaban sa kinabuhi sa mga kababayen-an.
“Kini ang rason nganong usa ka pribilehiyo para kanako ang makauban ang mga kababaenhan nga dili lang simbolo sa kusog ug paglaom, apan tinuod nga mga kampeyon sa pagpasiugda sa community development sa pagpalig-on sa pagpanginabuhi, ug sa paghatag og living standard sa atong komunidad,” sulti niya.
Gitambongan ang kalihokan ni District IBM Jane Ang, Acting Provincial Agriculturist Engr. Cristopher Dalisay, ug mga representante sa mga LGUs.
Sa highlight sa selebrasyon, gipakita ang talento ug kahanas sa kababayen-an pinaagi sa nagkalain-laing kompetisyon. Nakadaog ang San Isidrosa titulo nga Ginang RIC 2025, samtang ang Talaingod nakakab-ot sa ikaduhang puwesto, gisundan sa Tagum City ug Kapalong. Sa Folk Dance Contest, migula ang Talaingod isip kampiyon, uban ang Kapalong ug Carmen sa 1st ug 2nd runner-up. Gihakot usab ang San Isidro sa espesyal nga titulo, Best Glamour ug Best Runway. Sa Table and Product Display Contest, gibida sa Carmen ang ilang abilidad nga mao’y nakapahimo kanila nga kampiyon, samtang nakuha sa Panabo City ang ikaduhang puwesto, ug sa Kapalong ang ikatulo.
Writer: Jun Rey VillanuevaPhotos: Abe Handugan
