Andam nga nisabak ang Probinsyal nga Panggamhanan sa Davao del Norte sa Regional Assessment nga gipahigayon sa Department of the Interior and Local Government (DILG) XI alang sa Calendar Year 2022 Seal of Good Local Governance o mas nailhan nga SGLG, niadtong Abril 26, sa VIP Clubhouse, Davao del Norte Sports and Tourism Complex, Mankilam, Tagum City.

Kahinumduman nga niadtong tuig 2019, ang Davao del Norte lamang sa tibuok Rehiyon Onse ang nag-inusarang probinsya nga nakadawat sa prestihiyosong pasidungog. Ang SGLG ginahatag lamang ngadto sa Local Government Units (LGUs) nga “compliant” sa mandato sa Local Government Code of the Philippines ug naghatag og “excellent” public service sa katawhan.

Matud ni DILG XI Monitoring and Evaluation Division Chief Phillen C. Larabaster, mas “challenging” ang pagkab-ot sa SGLG sugod karong tuiga kay gikan sa pito (7), nahimo na nga napulo (10) ang Governance Areas o Assessment Criteria.

Subay sa Republic Act No. 11292 or SGLG Act, ang mga musunod ang sumbanan aron makabaton sa prestihiyosong selyo:

1. Financial Administration and Sustainability

2. Disaster Preparedness

3. Social Protection and Sensitivity

4. Health Compliance and Responsiveness

5. Sustainable Education

6. Business-Friendliness and Competitiveness

7. Safety, Peace and Order

8. Tourism, Heritage Development, Culture and Arts

9. Youth Development

Lakip sab sa rekistos nga adunay at least 10 per cent sa component LGUs ang makapasa sa SGLG calibration. Gipangandaman pag-ayo sa probinsya ang maong assessment kay ang pagbaton og SGLG magpamatuod nga ang lokal nga panggamhanan adunay saktong katakos sa paghatag og serbisyo ngadto sa mga lumulupyo. Dugang niini, mas dali sab makakuha ang LGU nga adunay SGLG og financial grants and assistance, loans, financial incentives sama sa Performance Challenge Fund, ug uban pa.

Gipaambit ni Governor Edwin “Kuya Gov” Jubahib ang pamaagi sa probinsya sa pag-implementar sa mga lakang pangkalamboan sa pagsulbad sa problema sa kaprobrehon ilabi na sa insurhensya sa mga hilit nga dapit. Sa paningkamot administrasyong Jubahib, nahimong nagmadaugon ang Davao del Norte sa pakigbatok niini sa nag-unang mga suliran sa lagyong komunidad.

Sa laing bahin, wala makapatigayon ang DILG ug assessment alang sa SGLG niadtong mga tuig 2020 ug 2021 tungod sa pandemya. Dakong paningkamot sa ahensya nga matabangan sa compliance ang mga LGUs aron masiguro ang tama ug mas taas nga kalidad sa serbisyo publiko sa atong nasud.

Writer: Mervin Jay Z. Suaybaguio