HANGTOD Septyembre 19, 2021, miabot na og 120,938 ka tawo ang kumpletong nabakunahan (fully vaccinated) sa tibuok Davao del Norte kontra COVID-19.

Kini maoy 16% sa target nga 744,405 ka tawo nga angay makadawat og kumpletong bakuna aron makab-ot ang “herd immunity.”

Gawas niini, nakadawat na sab og tig-isa ka dose ang 171,995 nga naghulat na lang sa ilang eskedyul alang sa ikaduhang pagbakuna. Ang gidaghanon maoy 23% sa angay bakunahan nga kung makumpleto moabot na unya halos 40% ang fully vaccinated sa probinsya.

Kahinumduman nga nagsige og hangyo si Gobernador Edwin “Kuya Gob” Jubahib sa nasyonal nga panggamhanan ug sa Department of Health (DOH) alang sa dugang bakuna sanglit paspas ang implementasyon sa DavNor PHO lakip ang tanang 11 ka LGUs.

Gumikan sa pagdaghan sa bakuna, nagpahinabo ang tibuok Davao del Norte og tulo ka adlaw nga eskedyul (Miyerkoles hangtod Byernes) apan ikasubo nga sa miaging semana, wala makapahigayon og RESBAKUNA sa adlaw'ng Byernes ang Provincial Health Office gumikan sa kakulang sa mga health workers. Ang uban kanila na-expose sa COVID nga gikinahanglang mag-quarantine aron malikayan makatakod.

Karong semanaha ipahigayon na sab ang RESBAKUNA diha sa 20 ka mga Vaccination sites gawas pa sa 13 ka mga Satellite sites nga gidumala sa 66 Vaccination teams sa tibuok Davao del Norte apil na ang Provincial Health Office nga magdugang sa gidaghanon sa mga nabakunahan.

Gilaoman nga sa hinapos niining tuiga o sa sayo nga bahin sa sunod tuig makab-ot na ang herd immunity nga 70% aron mapasig-uli ang kalihokan sa ekonomiya sa probinsya.

Mag-rehistro ang unang tikang alang sa pagbakuna.

Kinahanglang susihon ang blood pressure.

Kinahanglan sab nga interbyuhon sa mga doktor kung angay ba gyod kini nga bakunahan.

Human ma-"okay" sa doktor mosunod ang pagbakuna.

Human sa pagbakuna gikinahanglan pa nga i-check na sab ang blood pressure og obserbahan sulod sa pipila ka minutos.

Bisan kung human na mabakunahan, dili gyod una papaulion kung dili ma-"okay" ilabina ang blood pressure.

 

DavNor News