Nanumpa isip bag-ong chairman si Gobernador Edwin “Kuya Gob” Jubahib sa Davao del Norte Provincial Technical Education and Skills Development Committee atol sa unang quarterly meeting niini kagahapong adlawa, Mayo 10, didto sa Energy Park, Apokon, Tagum City.

Katimbang sa gobernador sa responsibilidad ang DTI Provincial Director Romeo L. Castanaga (Co-Chair), ug uban pang representante sa nagkalain-laing ahensiya sa panggamhanan.

Gihataga’g gibug-aton ni TESDA Regional Director Engr. Lorenzo G. Macapili ang pag-usab sa pilosopiya ug panghunahuna sa mga liders nga nakatambong sa patigayon ug giawhag ang tanan nga mamuhonan sa kalamboan pinaagi sa pagserbisyo sa pinakayano.

Lakip sa mga nahisgutan sa maong tigum ang mahimong papel ug regulasyon sa komitiba, mga kalab-oton, commitment ug badyet karong tuiga sama sa igahing pondo sa provincial scholarship program ug honorarium sa mga trainers sa Entrepreneurship Training Programs ug pagsagop sa PTESDC-Davao del Norte isip advisory council.

Ang PTESDC magsilbing tigpanday sa mga polisiya sa probinsya nga may kalambigitan sa paghatag og teknikal nga edukasyon, assessment ug skills certification. Gilaoman nga magtigum ang komitiba sa matag katapusang bulan sa kwarter.