MIDAGHAN ang kababayen-an nga miapil sa KAwsa sa AGrikulturA ug PAnginabuhian sa barangaY (KAAGAPAY) aron mahimong “kaagapay” (magkauban sa buluhaton) sa ilang mga bana.

Ang KAAGAPAY nga programa gilunsad ni Gobernador Edwin “Kuya Gob” Jubahib alang sa pagpatungha’g pagkaon gumikan sa kalisod nga nasinati sa COVID-19 pandemic.

Ang programa naglakip sa pagpananom og gulayon, pagtanom og mga kahoy (reforestation) ug ang pagbuhi og manok.

Namatikdan nga daghang mga asawa sa panimalay ang miapil dili lang sa pagpananom og gulay lakip na sa pagbuhi og manok. Abtik silang nag-organisar aron mahimong People’s Organization (PO) og mitabang nga maghimo’g kulongan aron makadawat og manok gikan sa KAAGAPAY ni Kuya Gob.

Gikuyogan sa ubang babayeng opisyales gikan sa Florida, Kapalong, matod ni Barangay Konsehal Elizabeth nga ready na ang ilang kulongan og manok na lang gyod ang kulang. Iyang gipasalamatan ang programa sa KAAGAPAY kay dako na kining tabang kanila.

“Nalipay gyod mi’g dako labi na sa kababaihan kay nakatabang gyod ni sa panginabuhian; sa pamilya pod, makatabang mi sa among bana aron molambo pod ang among panginabuhi kay nasayod mi nga kini nga tabang nga gihatag kanamo ni Kuya Edwin Jubahib, iya gyod ning gituyo aron nga matabangan ang mga lumulupyo sa matag barangay,” matod sa konsehala nga gipiling Presidente sa KAAGAPAY Council of Women sa barangay Florida, Kapalong.

Sa matag PO tulo ka opisyales ang mopailawom Sustainable Livelihood Training Course on Free Range Chicken nga gipasiugdahan sa KAAGAPAY sa pakig-alayon sa BMeg Integra, ang tighimo og pagkaon alang sa manok.