Tungod sa dakong pagsalig ug kumpyansa sa kasamtangang administrasyon, walo ka kanhing rebelde ang opisyal nga nibalik sa sabakan sa gobyerno sa Tahanan ng Punong Lalawigan sa Davao del Norte niadtong Abril 22.

Bisan pa man ang mga misurender dili lumulupyo sa probinsya, abli ang pultahan sa Davao del Norte alang kanila. Matud pa ni Governor Edwin “Kuya Gov” Jubahib, walay gipili ang panggamhanan kung kinsa ug asa sila gusto musurender kay usa lamang ang tumong sa tanang probinsya sa nasud, nga mao ang maundang na ang armadong pakigbisog.

Ang mga kanhing rebelde makadawat ug immediate support alang sa ilang nag-unang panginahanglan gikan sa nasyonal ug probinsyal nga panggamhanan ug immediate financial assistance gikan mismo kang Kuya Gov.

Gidayeg ni PCol. Ranie Hachuela, Philippine National Police Davao del Norte Provincial Director, nga ang probinsya ang usa sa dunay pinaka-malampuson nga implementasyon sa Executive Order No. 70 ni President Rodrigo Duterte.

Sa panglantaw ni Col. Luis Rex Brigante, Commander sa 1001st Brigade, ang insurhensiya usa ka krisis mao nga ang tumong sa gobyerno luwason ang mga biktima sa mali nga idelohiya sa New People’s Army.

Gilauman ni Major General Ernesto C. Torres, Jr., Commander sa 10th Infantry “Agila” Division, nga tungod sa pagsurender sa usa sa pinakadako nga leader sa NPA sa rehiyon nga si alyas Wa-ay, musunod na pud pagsurender ang mga kaubanan niini nga anaa pa sa kalihokan.

Padayon ang mga programa sa panggamhanan nga mag-agni sa mga miyembro sa NPA nga musurender na aron sa dili madugay maundang na ang insurhensiya.