KABAHIN gayod pagtubag sa sukaranan (basic) nga panginahanglan sa tao ang programa ni Gobernador “Kuya Gob” Edwin Jubahib ang KAwsa sa AGrikulturA ug PAngibuhian sa barangaY kun KAAGAPAY.

Kini ang mensahe ni Kuya Gob nga padayong gipaabot nila Liaison Officers (LOs) og kasamtangan mga Pastors Rene Boy Enguito, Jared Maliza ug Genaro ‘Jun’ Tado ngadto sa Barangays Esperanza, San Miguel, New Katipunan, Lungaog ug San Vicente atol sa Community Organizing sa KAAGAPAY.

“Unahon nato pag-address kining basic nga panginahanglan sa probinsya kay tigulang na ang atong probinsya pero ang panginahanglan basic ra gihapon. . Ingon ni Gob basic pa kaayo ang panginahanglan sa mga barangay, daghan pa kaayo ang atong kulang sa probinsya. . . mga panginahanglan sa agrikultura ug imprastruktura. Ang basic nga kinahanglan sa atong imprastruktura nga halos kada tuig naay baha. Gi-address na na ni Kuya Gob pinaagi’g desilting didto sa mga bukana sa sapa sama sa Bincungan,” matod ni Liaison Rene Enguito.

Bisan kung dili makahimong milyonaryo ang programang KAAGAPAY apan dako na kining tabang kung bahin sa sukaranang “panginahanglan para sa lamesa,” ang pagkaon, nga dili lang taman diha sa pamilya apan lakip na ang komunidad og sa katibuk-ang probinsya.

“Karon ang sa atong agrikultura . .mao ning sa KAAGAPAY. Basic ba nang mananom og gulay? Unya kanang magbuhi og manok? Di ni makadato sa atoa pero makatabang. Dili man promising nga ma-milyonaryo ta niini pero dako ni siya’g tabang nga naay programa sa gobyerno nga dawaton sa atong mga barangay. . Tungod ni sa kasingkasing ni Kuya Gob nga gusto motabang sa atong katawhan. . Mao ning tudloan ta para makatabang ta sa tanan,” padayong pahayag ni LO Enguito.

Gipasalamatan gayod ni Kuya Gob pinaagi sa mga Liaison Officers ang panahon og kakugi sa mga Purok Leaders.

“Salamat sa inyong panahon. . Kabalo mi dili lang ni para sa inyong kaugalingon kundili para ni sa inyohang kapwa purok kay kamo ang nag-representa sa inyong purok para mahibalo og ma-organize. Kining inyong presensya karon nag-represent na sa inyohang mga pamilya sa purok nga kamo ang magdala og kaayohan didto, motabang didto dili para lang sa inyong balay kundili ngadto sa inyong mga silingan ug mga kaubanan,” pasalamat ni Enguito.