Gisugdan sa Vicinity Bato, Barangay Palma Gil, Talaingod ang unang arangkada sa DavNor Adlaw sa Kalinaw: Information and Service Caravan kung diin gidala sa Probisyal nga Panggamhanan sa Davao del Norte ug partner agencies ang serbisyo didto mismo sa tugkaran sa mga nanginahanglan ug galisud nga mga miyembro sa tribung Ata-Manobo.

Tumong sa maong caravan nga maundang na ang armadong pakigbisog sa tibuok probinsya ilabi na kay duna pay pipila ka mga Ata-Manobo ang anaa gihapon sa kalihokan. Matud pa ni Provincial Administrator Engr. Josie Jean Rabanoz, nga giusa ang nagkadaiyang tabang ug serbisyo ug dala sa mga mas nanginahanglan nga komunidad aron matubag ang nag-unang panginahanglan sa tribu.

Gisaysay sa kanhing rebelde ug magtutudlo sa Salungpungan School sa Talaingod kung giunsa sila paglinla sa mga NPA para madani siya ug iyang mga kaubanan sa tribu nga musalmot sa kalihokan batok sa gobyerno. Sa maong higayon, siya na karon ang miagni sa mga anaa pa sa kalihokan nga musurender na kay ang gobyerno mao gyud ang tinuod nga muhaw-as kanila sa kalisud.

Hugot ang pagtuo ni Governor Edwin I. Juhabib nga ang paghatag sa mga nag-unang panginahanglan sa tribu ilabi na sa mga nahimutang sa mga Geographically Isolated and Disadvantaged Areas kon GIDAs ang makadani sa mga miyembro sa NPA nga mubalik sa gobyerno.

Matud pa ni Office of the Presidential Adviser on the Peace Process, Davao Region Area Manager Oliver Binancilan nga adunay mga maayong proyekto ang nasyonal nga panggamhanan alang sa mga Indigenous Peoples sa mga target area sa Davao del Norte sama sa mga pabalay ug paghimo ug mga dalan aron sa mas dali nga akses sa katilingban ug sa panggamhanan.

Ang caravan gilangkoban sa Probinsyal nga Panggamhanan sa Davao del Norte, Lokal nga Panggamhanan sa Talaingod, Office of the Presidential Adviser on the Peace Process, 1003rd IB, 56th IB, Davao del Norte Provincial Police Office, Department of the Interior and Local Government, Department of Labor and Employment, Department of Trade and Industry, Department of Education, National Commission on Indigenous Peoples, Department of Environment and Natural Resources Office, ug nagkadaiyang departamento sa kapitolyo ug munisipyo.