Kalipay ang gibati sa 94 nga mga benepisyaryo nga bag-ohay lang nakalampos sa Pantawid Pamilyang Pilipino Program (4Ps) sa lungsod sa Asuncion.
Bisan maputol na ang ilang ayuda sanglit nakaabot na sila sa limit nga pito (7) ka tuig ilalom sa programa o wala na silay mga anak nga ipatungha nga nagpangidaron 18 anyos paubos, duna na silay kompyansya sa kaugalingon nga makasagubang sa kalisud sa kinabuhi.
Si Leonada Olayan, usa ka benepisyaryo sugod 2015, dako ang pagpasalamat sa 4Ps nga nakatabang makaeskwela ang tulo ka mga anak: ang una, nakalampos na sa kursong BSBA; ang ikaduha, kasamtangang 3rd year college sa Crimimology; ug ang ikatulo, 1st year college Tourism. Gawas sa pinansyal, iyang namatikdan ang kabag-ohan sa relasyon sa iyang pamilya resulta sa Family Development Sessions (FDS).
“Ang akong mga anak duna silay pagsinabtanay sa usa’g usa, pagrespeto sa usa’g usa. Ug ingon man kami nga naay sakit, nagamit namo ang 4Ps sa panginahanglan namo sa ospital. So, salamat kaayo sa 4Ps,” matud niya.
Kalipay usab ni Julita Mejorada, lumolupyo sa New Bantayan, Asuncion nga ang duha niya ka mga anak nga nakahuman sa high school ug duna nay trabaho nakaabag na sa ilang inadlaw nga panginahanglan.
“Andam na gyud ko ana sir nga moatubang sa kalisud tungod sa wala pa na moabot ako na ng gipangandaman uban sa pagsalig sa atong buhi nga Diyos. Ako gyud ng gipangandaman unsa pa mang mga pagsulay nga moabot sa among kinabuhi magbarog mi nga malig-on,” pagsubay ni Mejorada.
Pagpatin-aw ni Regional FDS Specialist Evangeline Grandeza sa tumong sa maong programa dili aron padatuon ang mga benepisyaryo, hinuon giya lamang kini aron makabarog sila sa ilang kaugalingon. Dugang niya, “ang gobyerno anaa para mohatag og temporaryo nga alibyo sa atoang kalisdanan. Ang modiskarte ug ang maingon nato’g mo-Fights ani tanan kita mismo sa household. Kita mismo sa household ang maningkamot”.
Dunay kapin usa ka libo nga mga estudyante ang nagkinahangla’g dugang pa nga educational assistance sa pagtungtong sa kolehiyo karon nga nakagradwar na sila sa 4Ps. Gipasibaw ni Asuncion Mayor Atty. Eufracio “Yuri” Dayaday ang iyang suporta sa mga programa sa Department of Social Welfare and Development (DSWD) labi na sa 4Ps tungod kay iyang panglantaw nga maputol ang cycle of poverty sa iyang munisipyo pinaagi sa paghatag og ensaktong oportunidad.
“I accept the challenge nga katong 1000 plus nga estudyante suportahan nako na gikan sa module, gikan sa problema sa balayronon sa PTA, kung pwede ma-shoulder sa LGU para dili na moamot ang mga ginikanan ato ng buhaton,” pasalig sa mayor.
Gibutyag usab ni Edlyn Hoyohoy, MSWDO Head-Asuncion, ang sunod nga lakang sa LGU karon nga naglawig na paggawas sa programa ang mga benepisyaryo.
“Wala naman sila karon sa programa sa 4Ps so karon magpadayon ang monitoring sa LGU ug unsa man tong mga assistance nga ihatag, sila ang ma-priority para sa pamilya,” sulti ni Hoyohoy.
Isip pahalipay nagpadala usab ug tag-lima ka kilong bugas si Davao del Norte Gobernador Edwin “Kuya Gob” Jubahib alang sa mga gradweyts.
Sa kasamtangan dunay 5,184 active beneficiaries ang lungsod sa Asuncion.
