55 ka mga benepisyaryo sa Pantawid Pamilyang Pilipino Program (4Ps) sa Lungsod sa New Correla, Davao del Norte ang nigradwar niadtong Marso 25, pinaagi sa usa ka pormal nga seremonyas didto sa Municipal Gymnasium.

Susama sa usa ka graduation ceremony, pormal nga gitunol ang mga sertipiko sa paglampos sa mga opisyal sa probinsya, lungsod ug Department of Social Welfare and Development Regional ug Provincial nga mga opisina, ngadto sa mga benepisyaro sa ibabaw sa entablado inubanan sa naandan nga pagmartsa.

Matud pa ni Diane Angco nga taga Barangay Poblacion, dako ang tabang nga nahimo sa 4ps sa ilang kinabuhi ilabi na sa ilang pag-eskwela. Apan butyag ni Diane nga labaw pa sa pinansiyal nga tabang ilang nakuha sa DSWD kay nahimong bililhon ang mga kaalam nga ilang nakuha sa Family Development Sessions nga mihatag kanila ug giya para mahimong mas hugot ug mas malipayon ang relasyon sa mga miyembro sa ilang banay.

Gilauman ni 4ps Regional Project Coordinator, Margie Cabido, nga mahimong hulagway ug tigpamaba ang mga ning-gradwar kung unsa kanindot ug kamalampuson ang programa. Dugang niini, nanghinaot siya nga mas maningkamot ang kanhing benepisyaryo nga mahaw-as sila sa kalisud. Iya usab giklaro nga wala nay ayuda nga makuha pa ang migradwar gawas sa regular nga programa sa DSWD.

Sumala pa ni 4ps Davao del Norte Provincial Link, Blaissel Jane Fernandez nga ang Pantawid Pamilya Graduation usa ka pagpadayag sa pagtambayayong ug seryoso nga pagtinabangay sa mga stakeholders aron mahaw-as sa kapobrehon ang pamilyang Pilipino.