Gipanaad ni Provincial Information Officer Dr. Mervin Jay Suaybaguio nga maningkamot ang administrasyon ni Kuya Gov. Edwin I. Jubahib nga matabangan nga makalampos ang daghang estudyanteng naka-enrol sa programang Master of Public Administration nga dugay na nga nadelatar tungod sa ilang thesis.

Kini ang nahimong sentro sa mensahe ni Dr. Suaybaguio nga mao pud ang Executive Director sa Davao del Norte Learning Institutute (DNLI) atol sa gipahitabong Closing Program sa Training cum Writeshop on Thesis Writing sa Pavilion didto sa Davao del Norte Sports and Tourism Complex, Mankilam, Dakbayan sa Tagum, kagahapon, Marso 7. Ang maong training nag-giya sa mga estudyante sa paghimo sa ilang pinakaulahing requirement nga mao ang thesis aron malampos ang programang MPA ubos sa pakigtambayayong sa Davao del Norte State College ug mga consortium niining mga unibersidad.

Kahinumduman nga namugna ang Training isip paagi aron maawhag ang mga estudyante nga mu-enrol ug balik sa saad nga sila giyahan ug tabangan sa ilang panginahanglanon. Sa karon, unom pa lang sa 153 enrolled MPA students gikan pa niadtong tuig 2015 ang nakahuman. Naglaom ang DNLI nga karong tuiga, mutaas ang "graduation rate" sa MPA sama sa bachelor's program nga katugbang niini.

Andam mugahin ug pondo ang DNLI alang sa mga interbensyon nga makatabang sa mga estudyante nga makaabot ang ilang pangandoy nga mahuman ang mga kurso nga mutabang kanila nga mapalambo ilang katakos sa pagpanerbisyo sa katawhan.

Ang DNLI usa ka institusyon sa Probinsyal nga Panggamhanan sa Davao del Norte nga nagahatag ug higayon sa mga opisyal ug empleyado sa lokal nga panggamhanan hangtod sa mga barangay nga makabaton ug pormal nga edukasyon sa mga programang Master of Public Administration, Bachelor of Public Administration, Bachelor of Science in Entrepreneurship ug Bachelor of Science in Disaster Resiliency and Management.