Malampuson nga gilunsad ang BIDA Solusyon Campaign kagahapon, Miyerkules, didto sa Dakbayan sa Panabo. Ang maong social marketing campaign nga nagpasabot nga B-awal ang walay mask, I-sanitize ang kamot, D-istansya ug usa ka metro ug A-ksyon base sa tinuod nga impormasyon adunay tumong nga mapakusgan ang mga lakang nga ginabuhat sa panggamhanan alang sa pagpugong sa pagkuyanap sa pandemyang COVID-19.

Sa pakighinabi kang Dr. Abdullah Dumama Jr., Undersecretary of Health Vis-Min Field Implementation Office, iyang gisaysay ang dakong bili sa pagpatuman niining BIDA Solusyon kontra COVID 19 sanglit mabungahon gayud ang mahimong epekto niini sa katawhan. Mapasalamaton usab siya sa mga stakeholders ilabi na sa Lungsod sa Panabo ug sa Probinsyal nga Panggamhanan sa Davao del Norte tungod sa mainiton nilang pagsuporta sa programa.

Ang maong kampanya naglambigit sa mga intitusyon sa gobyerno sa panguna sa Department of Health nga gilangkuban nila USec. Dumama ug Dr. Annabelle Yumang, Regional Director DOH XI, inubanan nila Regional Director Frances Mae Macapagat sa Philippine Information Agency XI, Provincial Director Abito D. Bernasor sa Department of the Interior and Local Government-Davao del Norte, Mayor Jose Relampagos sa Dakbayan sa Panabo ug mga representante sa Probinsyal nga Panggamhanan sa Davao del Norte nga sila Dr. Alfredo Lacerona, Incident Commander sa Davao del Norte COVID-19 Response ug Dr. Mervin Jay Suaybaguio, Provincial Information Officer.

Gipalawman ni RD Macapagat ang importansya sa – Aksyon base sa Tinuod nga Impormasyon aron ang katawhan mag igmat sa mga nagkadaghan nga “fake news”. Gisaysay usab ni RD Yumang ang tabang nga mahatag sa pagbatok sa pandemya kung ang katawhan moduyog, moapil, ug magpakabana sa mga programa sa gobyerno. Dugang usab nga pahimangno gikan kang PD Bernasor nga ipasibaw sa katawhan ang ilang ka-disiplinado sa pagtuman sa mga health protocols.

Atol sa “launching”, nihatag ug “commitment response” ang Lokal ug Probinsyal nga Panggamhanan sa Panabo ug Davao del Norte sa panguna nila Mayor Relampagos ug Dr. Suaybaguio. Misunod ang “pledge of commitment” sa mga stakeholders nga gipahisayon ni Dr. Lacerona ug nahuman ang programa sa paghatag ug “commitment response” ni Ms. Betty Francia, Executive Assistant sa Philippine Banana Growers & Exporters Association.

 

 

 

DavNor News