Gilusad sa Probinsyal nga Kagamhanan sa Davao del Norte ang pag-abli sa P3.5 million nga Multi-Purpose Gym/Evacuation Center sa Bahay Pag-asa nga nahimutang sa New Corella, Davao del Norte niadtongSeptyembre 1, 2020.

Ang okasyon maoy ‘highlight’ sa ika-6 nga anibersaryo sa Bahay Pag-Asa, ang pasilidad alang sa repormasyon sa mga children in conflict with the law (CICL) o mga batang nakalapas sa balaod.

Sa pagpatuman sa proyekto gitan-aw ni Kuya Gob Edwin I. Jubahib ang kinatibuk-an nga kalambuan, apil ang rehabilitasyon ug kaayohan sa mga batang nahisalaag.

Sulti ni Provincial Administrator Engr. Josie Jean Rabanos nga subay kini sa mandato sa probinsya aron pag-amuma ug pagtagad sa panginahanglanon sa mga kabataan, bisan pa og milihis pa sila.

“Giyahan nato ang mga bata nga matagaan pa og pagtagad bisan pa nga nilihis na sila,” ingon ni Rabanos.
Sa tanan-tanan, dunay nay 144 ka residente ang milampos sa pasilidad sulod sa unom ka tuig, diin duna nay 84 niini ang migawas na ug nibalik sa sosyalidad.

Isip ka parte sa ilang rehabilitasyon, duna na poy 14 ka residente ang nahimong NC2 passer sa Shelded Metal Arc Welding, samtang 24 pa ang padayong nagtoon sa maong skills training.

Kauban sa mga bisita sila Anselmo Junio, ang representante ni Kuya Gob. Edwin I. Jubahib, Ronaldo B. Tumamac, representante ni Mayor Jorjan Federiso, Provincial Human Resources Management Officer Edwin A. Palero, ug Judge Regina F.Montiel.